सुर्खेत। बहुविवाह मुद्दामा सजायको फैसला भई फरार भएका दुईजना प्रतिवादी पक्राउ परेका छन्। जिल्ला प्रहरी कार्यालय सुर्खेतबाट सादा पोशाकमा खटिएको टोलीले एक युवक र युवतिलाई पक्राउ गरेको हो।
सोमबार बिहान १० बजे वीरेन्द्रनगर–१२ सहकारी चोक नजिकबाट वीरेन्द्रनगर–५ चिसापानीका ३७ बर्षीय भीमबहादुर सुनार र सोही ठाउँकी ३३ बर्षीया जानकी सुनार पक्राउ परेका हुन्।
जिल्ला प्रहरी कार्यालय सुर्खेतका अनुसार उनीहरुलाई बहुविवाह मुद्दामा प्रतिव्यक्ति ११ महिना कैद र ५ हजार रुपैयाँ जरिवाना तोकिएको थियो।
सोही क्रममा भवितव्य ज्यान मुद्दामा ५ सय रुपैयाँ जरिवाना तोकिएका फरार प्रतिवादी पनि पक्राउ परेका छन्। भवितव्य मुद्दामा पक्राउ पर्नेमा ३८ बर्षीय खगेन्द्रबहादुर राजी रहेका छन्।
पक्राउ परेका तीनैजनालाई जिल्ला अदालत सुर्खेतमा बुझाईएको प्रहरीले जनाएको छ।