सुर्खेत। जुम्लाको हिमा गाउँपालिकामा रहेको एक लघु जलविद्युतको पावर हाउस भाँसिदा एकै परिवारका तीन जनाको मृत्यु भएको छ। पावर हाउसमा काम गर्ने चौकीदारका श्रीमति र दुई छोराको मृत्यु भएको हो।
हिमा गाउँपालिका–१ आचार्यलिहीस्थित भित्री खोला लघु जलविद्युत् आयोजनाको पावर हाउस गएराति २ बजेतिर भाँसिएको हो।
जिल्ला प्रहरी कार्यालय जुम्लाका अनुसार मृत्यु हुनेमा त्यहाँ काम गर्ने चौकीदार गोरकबहादुर रावतका श्रीमति ३० वर्षीय विमला रावत दुई छोरा ९ वर्षीय भरत र ८ वर्षीय सूर्य रावत छन्। उनीहरु तीनै जना आयोजनाको पावर हाउस भित्र सुतिरहेका थिए।
गएराति चौकीदार गोरकबहादुर गाउँतिर गएका थिए। सोही बेला ठूलो पानी परेको र मुख्य कुलोमा घाँस दाउरा जम्मा भएर एक्कासी फोर्सले पानी आउँदा पावर हाउस भाँसिएको हो।
राती साढे २ बजेको घटना भए पनि स्थानीय गाउलेले ४ बजे मात्र थाहा पाएका थिए। शव पोष्टमार्टमका लागि कर्णाली स्वास्थ्य विज्ञान प्रतिष्ठानमा लगिएको प्रहरीले जनाएको छ।