सुर्खेत। सुर्खेतको वीरेन्द्रनगरस्थित मालपोत कार्यालयको स्टोरमा आगलागी भएको छ। शनिबार बेलुका कार्यालयको स्टोरमा आगलागी भएको जिल्ला प्रहरी कार्यालय सुर्खेतले जनाएको छ।
मालपोतको स्टोरमा बेलुका सवा ५ बजे आगलागी भएको जिल्ला प्रहरी कार्यालय सुर्खेतका प्रवक्ता डिएसपी वीरेन्द्र बीर विश्वकर्माले जानकारी दिए।
आगलागी भएको केही समयमै दमकल र सुरक्षाकर्मीको सहयोगमा आगो नियन्त्रणमा लिईएको छ। कार्यालयका कामकाजी कक्षसम्म आगो पुग्न नपाएको उनले बताए।
आगलागीबाट स्टोरमा रहेका दराज, एउटा मोटरसाईकल, दुई वटा जेनरेटर, कुर्ची, टेबुल, पुराना कम्प्यूटर लगायतका पुराना सामग्री जलेको उनले जानकारी दिए।
थन्काईएका जेनरेटमा भएको ज्वलनशील पदार्थले आगो बढी सल्किएको हुन सक्ने प्रहरीको अनुमान छ। आगलागीको कारण भने खुलेको छैन।