सुर्खेत। दैलेखको दुल्लुमा रहेको नेपाल राष्ट्रिय माध्यमिक विद्यालयको बहुउद्देश्यीय भवन शिलान्यास गरिएको छ। सोमबार कर्णाली प्रदेशका सामाजिक विकास मन्त्री घनश्याम भण्डारीले भवनको शिलान्यास गरेका हुन्। नेपाल–भारत विकास सहयोगअन्तर्गत निर्माण हुने भवनको शिलान्यास गर्न नेपालस्थित भारतीय राजदूतावासका कन्सुलर अविनाशकुमार सिंह पनि पुगेको थिए।
शिलान्यासका क्रममा मन्त्री भण्डारीले नेपाल र भारतबीचको सम्बन्धलाइ विशेष खालका परियोजनामार्फत थप प्रगाढ बनाउनुपर्ने बताए। शिक्षाका लागि बजारीकरण हुने क्रमलाई रोक्दै आफ्नो स्थानमा स्तरीय शिक्षा सञ्चालन हुने अपेक्षा गरिएको उनले बताए।
मन्त्री भण्डारीले पञ्चकोशी–लुम्बिनी बौद्ध सर्किट योजनासँगै विश्व सम्पदा सूचिमा समेट्न सकिने दैलेखका सम्पदा संरक्षण र बजारीकरणमा भारतको सहयोगको अपेक्षा गरिएको बताए।
दूतावासका कन्सुलर सिंहले बहुउदेश्यीय भवनसँगै नेपालको विकासका लागि अन्य परियोजनामा पनि भारतले सहयोग गर्ने आश्वासन जनाएका छन्। नेपालको शिक्षा क्षेत्रमा विगत २० वर्षदेखि भारतले आफ्ना परियोजनामार्फत सहयोग गरिरहेको उनले बताए। सिंहका अनुसार भारतीय विदेशमन्त्री डा. जयशंकर नेपालको भ्रमणमा आउँदा नेपाली परियोजनामा लगानी बढेको हो।
भारतले हालसम्म नेपाललाई एक हजार बढी एम्बुलेन्स र तीन सय भन्दा बढी विद्यालयका लागि बस दिएको उनले बताए।
कन्सुलर सिंहले नेपालको विकासका लागि दुई देशबीच निरन्तर साझेदारी भइरहेको दावी गरे। नेपालमा भूकम्प, बाढी, पहिरो जस्ता विपदको बेलामा भारतले राहत, पुनर्निर्माण जस्ता विषयमा सहयोग गरेको उनको भनाइ थियो।
४ करोड ८८ लाख लागतमा बन्ने विद्यालयको बहुउद्देश्यीय भवनका लागि दुल्लु नगरपालिकाको २० प्रतिशत र दूतावासको ८० प्रतिशत साझेदारी रहेको नगरप्रमुख भरतप्रसाद रिजालले जानकारी दिए। भवनलाई समयमै सम्पन्न गराउनका निम्ति स्थानीयको सहयोग आवश्यक भएकाले स्थानीय तहबाट निरन्तर समन्वय गर्ने प्रतिबद्धता मेयर रिजालले जनाएका छन्।