सुर्खेत। कर्णाली प्रदेशमा हुने दसौं राष्ट्रिय खेलकुदको लोगो र मस्कट मंगलबार सार्वजनिक गरिएको छ। युवा तथा खेलकुद मन्त्री तेजुलाल चौधरी, राष्ट्रिय खेलकुद परिषदका उपाध्यक्ष ध्रुव आचार्यले लोगो र मस्कट सार्वजनिक गरेका हुन्।
लोगो बिकास तमखुले तयार गरेका हुन्। लोगोमा कर्णाली नदी, नेपालको झण्डा, सात प्रदेश, देशको हिमाल, पहाड र तराई तथा शान्तिको प्रतिक परेवा अंकित गरिएको छ।
यस्तै मस्कट पनि तमखुले नै डिजाइन गरेका हुन्। यसपटकको मस्कट कर्णाली प्रदेशमा पाइने दुर्लभ जनावर रेडपाण्डाको छ।
दसौं राष्ट्रिय खेलकुद २०८२ जेठ ३ देखि १० गतेसम्म आयोजना गर्ने तय भएको छ।
दुई वर्षअघि पोखरामा सम्पन्न नवौँ राष्ट्रिय खेलकुद प्रतियोगिताबाट दशौँ राष्ट्रिय खेलकुद प्रतियोगिता कर्णालीमा आयोजना गर्ने निर्णय गरिएको थियो।
यसअघि २०८१ मंसिर २ देखि ९ गतेसम्म कर्णालीमा प्रतियोगिता गर्ने घोषणा भएको थियो। उक्त मितिमा हुन नसकेपछि चैत २३ देखि ३० गतेसम्म प्रतियोगिता आयोजना गर्नेगरि मिति तय भएको थियो।
पछिल्लो तोकिएको मितिमा पनि प्रतियोगिता आयोजना हुन नसक्ने भएपछि केही दिनअघि सचिवालय स्थापना गर्नेक्रममा २०८२ जेठ ३–१० गतेसम्मलाई मिति तोकिएको हो।