सुर्खेत। कोरोना संक्रमणको समयमा कर्णाली प्रदेशका बालवालिकाहरुको समान शिक्षा प्राप्त गर्नको लागि सरकारले भुमिका खेल्नुपर्ने भन्दै बाल क्लवमा आवद्ध बालवालिकाहरुले प्रर्दशन गरेका छन् ।
अहिलेको अवस्थामा प्रदेशका सबै बालवालिकाहरु शिक्षामा सहभागी हुन नपाएको भन्दै मंगलबार सुर्खेतको वीरेन्द्रनगरमा रहेको नवज्योति बाल संजालका बालवालिकाहरु मौन प्लेकार्ड प्रर्दशन गरेका हुन् ।
कोरोना संक्रमणको अवस्थामा सञ्चालन गरिएको अनलाइन ‘भर्चुअल’ कक्षामा कर्णालीका दुर्गम क्षेत्रका बालबालिका सहभागी हुन नसकेको भन्दै सबैलाई सहभागी गराउने खालको कार्यक्रम ल्याउनुपर्ने उनीहरुको माग रहेको छ ।
अन्तराष्ट्रिय बाल दिवसको अवसरमा नवज्योति केन्द्रको समन्वयमा सञ्जालले बाल अधिकारको सुनिश्चितताको ग्यारेन्टीको माग गर्दै मौन रुपमा प्रर्दशन गरेका छन् । कोरोना संक्रमणको जोखिमलाई मध्यनजर गर्दै उनीहरु वीरेन्द्रनगर स्थित मंगलगढी चोकमा सामाजिक दुरी कायम गर्दै प्लेकार्ड प्रर्दशन गरेका छन् ।
उनीहरुले ‘परिवारविहीन र भिन्न क्षमता भएका बालवालिकाको होस् स्याहार सुसार’, ‘अहिलेको अवस्थामा बालवालिकाहरुको शिक्षामा सरकारको भुमिका ?’ ‘बाल श्रम शोषण भइरहँदा राज्य र सम्बन्धित निकाय किन मौन’ लेखिएका प्लेकार्डहरु बोकेर प्रर्दशन गरेका थिए ।
मौन प्लेकार्ड प्रर्दशन पछि बाल सञ्जालका अध्यक्ष विरेन्द्र सोडारीले अहिलेको अवस्थामा भर्चुअल शिक्षा कर्णाली प्रदेशका लागि उपयूक्त नभएको बताए ।
‘कर्णालीका सबै ठाउँमा इन्टरनेटको सुविधा छैन, कुनै कुनै ठाउँमा मात्र यो सुविधा छ’ उनले भने, ‘यस्तो अवस्थामा हामी भर्चुअल कक्षाबाट वञ्चित भएका छौ ।’ हुने खाने र शहरमा बस्ने बालवालिकाको लागि मात्र भर्चुअल शिक्षा प्रभावकारी रहेको उनको भनाई थियो ।
बालवालिकाको लागि छुट्याइएको बजेट अन्य काममा खर्च गर्ने प्रवृत्ति रहेको भन्दै सम्बन्धित शिर्षकमै खर्च गरिनुपर्नेमा जोड दिए । सञ्जालका सहसचिव शुशिल सुनारले कोरोना परिक्षणको दायरालाई बढाउनुपर्ने भन्दै बालवालिकाको लागि उपयूक्त वैकल्पिक शिक्षाको व्यवस्था हुनुपर्ने बताए ।
बाल सञ्जालका सल्लाहकार ललित थापाले बालवालिकामाथि हुने हिंसाको अन्त्य हुनुपर्ने बताए । सामाजिक अपराधहरु बढ्दै गएको भन्दै अपराधीहरुलाई कारवाही हुनुपर्ने उनको भनाई थियो । मौन प्लेकार्ड प्रर्दशनिमा सहभागी नवज्योति केन्द्रका निर्देशक सिस्टर रोसिकाले कोरोना संक्रमणलाई ध्यान राख्दै मौन रुपमा प्लेकार्ड प्रर्दशन गरिएको बताइन ।
अहिलेको अवस्थामा अभिभावक विहीन बालवालिकाहरुको अवस्था नाजुक रहेको भन्दै उनीहरुको हक अधिकार प्राप्तीको लागि राज्यले ध्यान दिनुपर्नैमा जोड दिइन । उनले बालवालिकाको हक अधिकार सुनिश्चित गर्नको लागि सबैले आ आफ्नो ठाउँबाट ध्यान दिनुपर्ने बताइन । केन्द्रका फिल्ड सुपरभाइजर जरमाया बाँठाले विगतका वर्षहरुमा आयोजना हुने ठूला कार्यक्रमलाई स्थगित गरेर अहिले दुरी कायम गरि प्लेकार्य प्रर्दशन गरिएको बताइन ।