सुर्खेत। एमसीसी पारित भएको विरोधमा आज गरिएको प्रदर्शनमा केही प्रदर्शनकारी उग्र बनेपछि जिल्ला प्रशासन कार्यालय वीरेन्द्रनगरमा कर्फ्यू आदेश जारी गरेको छ। सोमबार बेलुका सवा ८ देखि मंगलबार बेलुका ७ बजेसम्मका लागि कर्फ्यू आदेश जारी गरिएको हो।
भोली उत्तरमा कपासे, दक्षिणमा काँक्रेबिहार, पूर्वमा सुब्बाकुना र पश्चिममा बाङ्गेसिमल क्षेत्र तोकेर कर्फ्यू आदेश जारी गरिएको प्रमुख जिल्ला अधिकारी खगेन्द्रप्रसाद रिजालले जानकारी दिए।
प्रदर्शन सकिएपनि केही प्रदर्शनकारीले साँझपख पार्टी कार्यालयहरुमा तोडफोड र आगजनी गर्न थालेपछि कर्फ्यू जारी गरिएको उनले बताए।
स्थिति नियन्त्रणमा लिन अहिले पनि वीरेन्द्रनगर बजारमा ठूलो संख्यामा प्रहरी परिचालन गरिएको छ।
नेत्रविक्रम चन्द विप्लव नेतृत्वको नेपाल कम्युनिष्ट पार्टीसहितका ६ राजनीतिक दलले सोमबार बन्द आह्वान गरेका थिए। बन्द सकिएपछि केही समूहले पार्टी कार्यालयहरुमा तोडफोड र आगजनी गरेका छन्।
प्रदर्शन घोषणा गरेका पार्टीले भने पार्टी कार्यालयमा गरिएका गतिविधिहरुमा आफूहरुको संलग्नता नभएको बताएका छन्।