सुर्खेत। पुरुषहरु यार्सागुम्बा टिप्न गएको मौका पारेर मुगुमा लुटपाट गर्ने समूह हतियारसहित पक्राउ परेका छन्। जिल्ला प्रहरी कार्यालय मुगुको टोलीले यही असार २१ गते जुम्लाबाट उनीहरुलाई पक्राउ गरेको हो।
जुम्लाको गुठीचौर गाउँपालिका–३ का गणेश भण्डारी, पूर्णप्रसाद भण्डारी र वडा नम्बर ४ का कमल थापालाई पक्राउ गरिएको जिल्ला प्रहरी कार्यालय मुगुले जनाएको छ।
मुगुको कार्मारोङ गाउँपालिका–१ डोल्फु गाउँका स्थानीयलाई हतियार देखाएर उनीहरुले लुटपाट गरेका थिए। उनीहरुले गाउँबाट लुटेका सुनका गहना जुम्लामा बिक्री गरिसकेको अवस्थामा बरामद गरिएको प्रहरीले जानकाएको छ।
घटनामा अरु पाँच जनाको पनि प्रत्यक्ष संलग्नता रहेको खुलेको छ। उनीहरुको खोजी भइरहेको प्रहरीले जनाएको छ।
उनीहरुबाट एक थान एसएलआर, एसएलआरको दुईवटा म्याग्जिन, २५ राउण्ड गोली र एक थान कटुवा पेस्तोल लगायतका अरु सामग्री पनि बरामद गरिएको प्रहरीले जनाएको छ। ती हतियारलाई उनीहरुले जुम्लको पातारासी गाउँपालिका–३ स्थित चुकेकाँध भन्ने ठाउँमा ओढारमा लुकाएका थिए।
उनीहरुसँग अत्याधुनिक हतियार एसएलआर कसरी आयो भन्ने विषयमा अनुसन्धान भइरहेको मुगुका प्रहरी प्रमुख डिएसपी वीरेन्द्र थापाले बताए।
गत जेठ १२ गते राति ८ बजेतिर उनीहरुले मुगुको डोल्फु गाउँमा पुगेर २४ घर र एक सार्वजनिक गुम्बामा लुटपाट गरेका थिए।
घटना प्रकृतिका अधारमा उनीहरुमाथि डाँकाचोरी, हातहतियार र संगठित अपराधतर्फ अनुसन्धान अघि बढाईएको डिएसपी थापाले बताए।