सुर्खेत । बुधवार कर्णाली प्रदेशका थप २४ जनामा कोरोना पुष्टि भएको छ । हालसम्म कर्णालीमा एक हजार सात सय १४ जना मध्ये १४ सय ७५ जना कोरोना मुक्त भई घर फर्किएका छन् । दुई सय ३३ जना मात्र कोरोनाका सक्रिय बिरामी रहेको कर्णाली प्रदेश सामाजिक विकास मन्त्रालयको स्वास्थ्य महाशाखाका प्रमुख डा. लक्ष्मी नारायण तिवारीले जानकारी दिए ।

उनका अनुसार कर्णाली प्रदेशमा कोरोना संक्रमणबाट मृत्यु हुनेको संख्या ६ जना पुगेको छ ।
सुर्खेतका १४ जना, दैलेख र सल्यानका ३, ३ जना,सल्यानका ५ जना, जुम्ला र अछामका १, १ जना गरी २४ जनामा कोरोना संक्रमण देखिएको हो ।
प्रदेश अस्पताल सुर्खेत, पशुपन्छी रोग अन्वेषण प्रयोगशालामा २१ जनाको र चौरजहारी नगरपालिका पीसीआर प्रयोगशाला रुकुममा ३ जनालाई परीक्षण गरिएको थियो ।

जिल्लागत संक्रमितको संख्या
अन्य प्रदेशका कर्णालीमा जाँच गरेका ५३ जना रहेका छन् । कर्णालीका मात्र हालसम्मको जम्मा १७१४ जना मध्ये जिल्लागत संख्या दैलेखमा ८०१ जना, सुर्खेतमा ४९६ जना, सल्यानमा २१६ जना, कालिकोटमा ५७ जना, जुम्लामा ४० जना, जाजरकोटमा २१ जना, मुगुमा ५ जना, हुम्लामा २ जना, डोल्पामा ४ जना र रुकुमपश्चिममा १९ जनालाई कोरोना संक्रमण पुष्टि भएको छ ।

सामाजिक विकास मन्त्रालयद्धारा जारी विज्ञप्ति ।